די מלחמה צווישן מדינת ישראל און איראן געפונט זיך ווייטער אויפן טיש ביי אחינו בני ישראל דרי ארץ הקודש, ווען מען איז שוין איינגעהילט א גאנצע וואך צייט אין זארג און שרעק, צוליב די נאכאנאנדע מיסיל אטאקעס וואס קומען צו פליען פון איראן, אין די צייט וואס די מדינת ישראל מיליטער באמבאדירט העפטיג אין איראן צו חרוב לייגן זייערע נוקלעארע מעגליכקייטן.
היינט פארטאגס איז געקומען צו פליען א באראדזש פון ארום דרייסיג מיסילס פון איראן, און לויט באריכטן איז עס געווען די שעדליכע קלאסטער באמבעס. ליידער האט עס באטראפן עטליכע פלעצער און פארוואונדעט צענדליגע מענטשן, אבער בחסדי ה' איז קיינער נישט אומגעקומען פון די אטאקעס.
די סורוקה שפיטאל אין באר שבע איז דירעקט באטראפן געווארן פון א באמבע, און בחסדי ה' האט עס באטראפן א טייל פון די געביידע וואס איז נעכטן עוועקואירט געווארן צוליב די מלחמה, ווען די פאציענטן פון יענע אפטיילונג זענען געווארן אריבערגעפירט צו אנדערע אפטיילונגען. שווערע שאדן ווערט באריכטעט פאר די שפיטאל געביידע, אבער פארוואונדעטע איז נאר דא אויף א לייכטע פארנעם, און די שפיטאל אפערירט יעצט אויף א געצוימטע פארנעם צו קענען פאררעכטן די שאדן, ווען פילע פאציענטן ווערן אריבערגעפירט צו אנדערע שפיטעלער, און ארומיגע איינוואוינער ווערן פארבעטן נישט צו נוצן דעם שפיטאל פאר מינדערוויכטיגע זאכן.
אויך איז געפאלן א באמבע אין רמת גן, א באמבע אין חולון, און אין נאך פלעצער, וואו א צאל מענטשן זענען פארוואונדעט געווארן, טייל אויף א שווערע פארנעם. שפעטער פארמיטאג איז ווידער געקומען צו פליען א באראדזש פון ארום צען מיסילס, פון וואס עס איז נישט באריכטעט געווארן קיין פארוואונדעטע.
אין די צייט וואס מען האט אידענטיפיצירט פליענדע מיסילס פון איראן היינט פארטאגס, האט א אל על פליגער אונטערוועגנס מיט געשטראנדעטע פון קפריסין קיין ארץ ישראל, זיך צוריקגעדרייט קיין קפריסין צוליב די געפאר, און שפעטער ווען די מצב האט זיך בארואיגט האט די פליגער געלאנדעט בשלום אין ארץ ישראל.
היינט דורכ'ן טאג פליען ארויס נאך עטליכע פליגערס מיט געשטראנדעטע מדינת ישראל בירגער פון פילע לענדער, אריינגערעכנט צוויי פליגערס פון ניו יארק, א פליגער פון טיילאנד, א שיף פון קפריסין, און נאך פליגערס פון אנדערע לענדער זענען באשטימט אויף קומענדיגע וואך אהיימצוברענגען געשטראנדעטע.
