מרנן ורבנן שרי התורה חברי ביד"ץ העדה החרדית זענען היינט ארויסגעקומען מיט א הייסע רוף צו כלל ישראל בכל מקומות מושבותיהם, איינצורייסן וועלטן און מעורר זיין רחמי שמים אין ליכט פון די שרעקליכע מצב המלחמה וואס הערשט אין ארץ ישראל, ווען אידישע קינדער געפונען זיך בצרה ובמצוקה, מחוץ תשכל חרב ומחדרים אימה רח"ל.
די גדולי הדור שרייבן אז די יעצטיגע צושטאנד שרייט אויף רחמי שמים, אידישע קינדער זענען דערשראקן און גייען נישט אין די גאס, מען הערט מלחמה געשרייען און ליידער זענען שוין געפאלן עטליכע אידישע קרבנות ה"י. דעריבער איז די חוב צו נעמען אומנות אבותינו בידינו און מעתיר זיין ביים בורא כל עולמים לביטול רוע הגזירה.
מארגן מאנטאג ביום כ' סיון, די טאג וואס איז שוין באשטימט פאר לאנגע יארן אלס א יום סליחה ותחנונים, וועט מען זאגן ספר רביעי שבתהלים און די יהי רצון דערנאך, סליחות ישראל נושע בה' און די תפילה פון שמע קולנו, און מעורר זיין בתפילה ובתחנונים אין יעדע געלעגנהייט אז מען זאל שוין נאר הערן גוטע בשורות.
אין די זעלבע צייט טוען צענדליגע טויזענטער אידן אין ארץ ישראל אויספאלגן די הוראות פון מערערע גדולי הדור וואס האבן געהייסן צו פאלגן די זיכערהייט אנווייזונגען, הגאון הגדול רבי דוב לאנדא שליט"א ראש ישיבת סלאבאדקע האט איבערגעגעבן זיין דעת תורה הברורה אז די אלע וואס לערנען שוין גמרא זאלן גיין אין חדר אריין, אבער בלויז אין די מוסדות וואס פארמאגן א פארזיכערטע שעלטער אין פאל פון נויט.
פילע אידן זענען ווייטער געשטראנדעט אין פארשידענע לענדער איבער די וועלט, אין די צייט וואס די לופט רוימען אין ארץ ישראל זענען פארשלאסן פאר ציווילע פליגער. און אלע פליגער זענען אפגערופן פאר נאך עטליכע טעג, וואס באדייט אז אידן וואס זענען צוגאסט אין ארץ ישראל קענען נישט ארויספארן, און ארץ ישראל'דיגע אידן וואס געפונען זיך אין אויסלאנד קענען נישט אהיימפארן.
דעם שבת האבן געוויילט אין קפריסין ארום צוויי און א האלב טויזענט געשטראנדעטע אידן, און די פארוואלטונג פון די ארטיגע בית חב"ד האט צוגעשטעלט אלע באדערפענישן ביד רחבה.
צוליב די זיכערהייט ווארענונגען זענען אסאך קאמערציאלע פלעצער אין ארץ ישראל פארשלאסן, די שריד בית מקדשינו די כותל המערבי איז ליידיג פון מתפללים, אתרא קדישא מירון איז ליידיג, און אזוי אויך פילע בתי מדרשים און ישיבות וואס זענען פארשלאסן צוליב די זיכערהייט געפאר.
פילע געפלאנטע גרויסע מעמדים און מאורעות וואס האבן געזאלט פארקומען אין די טעג לענגאויס ארץ ישראל, זענען געווארן אפגערופן און אפגעשטופט לאור המצב, און כלל ישראל איבער די גאנצע וועלט איז מתפלל למען שלום אחינו בני ישראל בארץ הקודש מען זאל נאר הערן גוטע בשורות בביאת גואל צדק במהרה בימינו.
